ອົງການອະນາໄມໂລກ ໄດ້ຮັບການສ້າງຕັ້ງຂຶ້ນໃນວັນທີ 7 ເມສາ ປີ 1948 ໂດຍມີເປົ້າໝາຍເພື່ອຮັບປະກັນຜົນປະໂຫຍດສູງສຸດທາງດ້ານສາທາລະນະສຸກຂອງໝົດທຸກຄົນ.

ພະນັກງານອົງການອະນາໄມໂລກ ຫຼາຍກວ່າ 7000 ຄົນ ໃນທົ່ວໂລກ ເຮັດວຽກຮ່ວມກັບລັດຖະບານ ແລະ ຄູ່ຮ່ວມງານພາກສ່ວນອື່ນໆ ເພື່ອປັບປຸງວຽກງານສາທາລະນະສຸກ ໃນທົ່ວໂລກ. ອົງການອະນາໄມໂລກ ເປັນອົງການສະເພາະດ້ານ ທີ່ມີເອກະລາດ ແລະ ເປັນອົງການໜຶ່ງໃນເຄືອສະຫະປະຊາຊາດ.

ອົງການອະນາໄມໂລກ ໄດ້ຊ່ວຍເຫຼືອປະເທດຕ່າງໆ ໃນການສ້າງລະບົບສາທາລະນະສຸກແຫ່ງຊາດໃຫ້ແຂງແກ່ນ ແລະ ໃນການກະກຽມ ແລະ ການໂຕ້ຕອບຕໍ່ເຫດການສຸກເສີນຕ່າງໆ. ພວກເຮົານຳພາວຽກງານຕ້ານພະຍາດທີ່ບໍ່ຕິດຕໍ່ (NCD) ເຊັ່ນ: ພະຍາດຫົວໃຈ, ມະເຮັງ ແລະ ເບົາຫວານ ທີ່ເປັນສາເຫດການເສຍຊີວິດກ່ອນໄວອັນຄວນຂອງຫຼາຍລ້ານຄົນໃນທຸກໆປີ.

ອົງການອະນາໄມໂລກເຜີຍແຜ່ວຽກງານປົກຄຸມສຸຂະພາບທົ່ວປວງຊົນ, ຢາທີ່ປອດໄພ ແລະ ມີປະສິດທິພາບ ແລະ ຄວາມພະຍາຍາມ ໃນການແກ້ໄຂຄວາມບໍ່ເທົ່າທຽມທາງສຸຂະພາບ ແລະ ປັດໄຈທາງດ້ານສັງຄົມທີ່ກະທົບຕໍ່ສຸຂະພາບ. ພວກເຮົາເປັນຜູ້ນຳທີ່ບໍ່ມີຂໍ້ຂັດແຍ່ງ ສຸມໃສ່ການສ້າງບັນທັດຖານ, ມາດຕະຖານ ແລະ ຄຳແນະນຳ ກ່ຽວກັບສາທາລະນະສຸກໃນທົ່ວໂລກ.

ດຣ ທິມໂມຕີ ອາມສະຕຣອງ ມາຈາກລັດນິວເຊົາເວວ, ປະເທດອົດສະຕາລີ, ເປັນຜູ້ຊ່ຽວຊານທີ່ມີປະສົບການຫຼາຍກວ່າ 30 ປີ ໃນຂົງເຂດການທູດເພື່ອສົ່ງເສີມວຽກງານສາທາລະນະສຸກ ແລະ ຂົງເຂດພະຍາດຊຳເຮື້ອ. ຫຼັງຈາກທີ່ໄດ້ເຮັດວຽກກັບຫຼາຍອົງກອນທີ່ເຮັດວຽກໃນຂົງເຂດນະໂຍບາຍກ່ຽວກັບສຸຂະພາບ ເປັນເວລາ 4 ປີ, ດຣ ທິມໂມຕີ ອາມສະຕຣອງ ໄດ້ເຂົ້າເຮັດວຽກກັບອົງການອະນາໄມໂລກໃນປີ 2002 ໂດຍໄດ້ລົງເລິກຂົງເຂດພະຍາດຊຳເຮື້ອ.

ດຣ ທິມໂມຕີ ອາມສະຕຣອງ ໄດ້ເຮັດວຽກຢູ່ອົງການອະນາໄມໂລກມາເປັນເວລາ 22 ປີແລ້ວ ເຊິ່ງທ່ານໄດ້ປະຈຳການຢູ່ສຳນັກງານໃຫຍ່ຂອງອົງການອະນາໄມໂລກ ທີ່ ເຊີແນວ, ປະເທດສະວິດເຊີແລນ ເປັນວິຊາການຮັບຜິດຊອບວຽກງານພະຍາດຊຳເຮື້ອ, ຜູ້ປະສານງານ ວຽກງານພະຍາດຊຳເຮື້ອ ແລະ ສົ່ງເສີມສຸຂະພາບ, ຫົວໜ້າໜ່ວຍງານ ຍຸດທະສາດສາກົນ ກ່ຽວກັບການສົ່ງເສີມໂພຊະນາການ, ການອອກກຳລັງກາຍ ແລະ ສຸຂະພາບ ແລະ ຫົວໜ້າກອງເລຂາໃຫ້ແກ່ຄະນະກຳມາທິການຂັ້ນສູງຂອງອົງການອະນາໄມໂລກ ວ່າດ້ວຍການຫຼຸດຜ່ອນພະຍາດອ້ວນໃນເດັກ. ນັບແຕ່ປີ 2015, ດຣ ທິມໂມຕີ ອາມສະຕຣອງ ກໍໄດ້ດຳລົງຕຳແໜ່ງເປັນ ຫົວໜ້າພະແນກກົນໄກການພົວພັນກັບປະເທດສະມາຊິກ ເຊິ່ງໃນການດຳລົງຕຳແໜ່ງດັ່ງກ່າວ, ດຣ ທິມໂມຕີ ອາມສະຕຣອງ ໄດ້ຮັບຜິດຊອບວຽກງານທີ່ຕິດພັນກັບກອງປະຊຸມສະມັດຊາໃຫຍ່ອົງການອະນາໄມໂລກ ແລະ ຄະນະບໍລິຫານງານສູງສຸດຂອງອົງການອະນາໄມໂລກ ເຊິ່ງທ່ານໄດ້ຊີ້ນຳວຽກງານການພົວພັນວຽກງານທີ່ເປັນຍຸດທະສາດກັບບັນດາປະເທດສະມາຊິກຂອງອົງການອະນາໄມໂລກ 194 ລັດ ໃນຂັ້ນສູງສຸດ ພ້ອມທັງຄຸ້ມຄອງການດຳເນີນບັນດາກົນໄກ ແລະ ໂຄງຮ່າງຈັດຕັ້ງການບໍລິຫານຂັ້ນສູງອື່ນໆຂອງອົງການອະນາໄມໂລກ.

ໃນວຽກງານການທູດເພື່ອສົ່ງເສີມວຽກງານສາທາລະນະສຸກ, ດຣ ທິມໂມຕີ ອາມສະຕຣອງ ໄດ້ຊີ້ນຳວຽກງານທີ່ຕິດພັນກັບການພົວພັນກັບບັນດາລັດສະມາຊິກ ແລະ ການທູດ ເພື່ອວາງທິດທາງຍຸດທະສາດໃຫ້ແກ່ວາລະວຽກງານສາທາລະນະສຸກສາກົນ. ທ່ານໄດ້ເນັ້ນໃສ່ການຮັບປະກັນໃຫ້ບັນດາລັດສະມາຊິກທີ່ມີລາຍຮັບຕ່ຳຫາປານກາງ ໄດ້ມີສ່ວນຮ່ວມໃນວາລະການຕັດສິນນະໂຍບາຍສາທາລະນະສຸກລະດັບສາກົນ ແລະ ສຸມໃສ່ສະໜັບສະໜູນໃຫ້ບັນດາປະເທດສະມາຊິກເປັນເອກະພາບໃນການຕັດສິນໃຈຮ່ວມກັນດ້ານວິຊາການ ແລະ ການເມືອງ ໃນບໍລິບົດທີ່ພູມສາດການເມືອງມີຄວາມສັບຊ້ອນ ແລະ ລະອຽດອ່ອນ. ໃນໄລຍະ 20 ປີທີ່ຜ່ານມາ, ດຣ ທິມໂມຕີ ອາມສະຕຣອງ ໄດ້ປະກອບສ່ວນໃນວຽກງານອັນຮີບດ່ວນໃນການເລັ່ງແກ້ໄຂຜົນກະທົບຈາກການປ່ຽນແປງດິນຟ້າອາກາດ ແລະ ການເສື່ອມໂຊມຂອງສິ່ງແວດລ້ອມທີ່ເພີ່ມທະວີຄວາມໄວ ແລະ ຮຸນແຮງຂຶ້ນນັບມື້ ພ້ອມທັງເປັນໄພຂົ່ມຂູ່ອັນຮ້າຍແຮງທີ່ສຸດຕໍ່ກັບສຸຂະພາບຂອງຄົນເຮົາ.

ໃນຂົງເຂດພະຍາດຊຳເຮື້ອ, ດຣ ທິມໂມຕີ ອາມສະຕຣອງ ໄດ້ນຳພາການດຳເນີນການຄົ້ນຄວ້າ ກ່ຽວກັບ ປັດໄຈສ່ຽງຕໍ່ພະຍາດຊຳເຮື້ອ ໃນຫຼາຍກວ່າ 50 ປະເທດທົ່ວໂລກ ແລະ ຍັງໄດ້ສະໜັບສະໜູນບັນດາຍຸດທະສາດທີ່ຕິດພັນກັບການຫຼຸດຜ່ອນພະຍາດອ້ວນໃນເດັກ ແລະ ການອອກກຳລັງກາຍ ໃນທົ່ວທຸກພາກພື້ນຂອງອົງການອະນາໄມໂລກ.

ຕະຫຼອດການດຳລົງຕຳແໜ່ງຂອງ ດຣ ທິມໂມຕີ ອາມສະຕຣອງ, ທ່ານໄດ້ຖືເປັນບູລິມະສິດການສະໜັບສະໜູນບັນດາປະເທດສະມາຊິກຂອງອົງການອະນາໄມໂລກ. ທ່ານໄດ້ລົງເຮັດວຽກຢູ່ຫຼາຍກວ່າ 80 ປະເທດ (ລວມທັງປະເທດພາຍໃນທະວີບອາຊີ) ເຊິ່ງທ່ານໄດ້ສຸມໃສ່ການສະໜັບສະໜູນການສ້າງ ແລະ ຈັດຕັ້ງປະຕິບັດຍຸດທະສາດ, ນະໂຍບາຍ ແລະ ແຜນງານທີ່ຈັດຕັ້ງປະຕິບັດໄດ້ຈິງ, ມີເປົ້າໝາຍທີ່ບັນລຸໄດ້ຈິງ ແລະ ເນັ້ນໜັກໃຫ້ການຈັດຕັ້ງປະຕິບັດເກີດໝາກຜົນເປັນຈິງ ເຊິ່ງນີ້ເປັນສິ່ງທີ່ເຮັດໃຫ້ເພິ່ນຍຶດໝັ້ນໃນເປົ້າໝາຍຂອງອົງການອະນາໄມໂລກ ຍ້ອນວ່າການຊ່ວຍເຫຼືອທາງວິຊາການຈາກອົງການອະນາໄມໂລກຈະເກີດໝາກຜົນອັນດີຕໍ່ບັນດາປະເທດສະມາຊິກໄດ້ ກໍຕໍ່ເມື່ອການຊ່ວຍເຫຼືອນັ້ນສອດຄ່ອງກັບວຽກງານທີ່ເປັນບູລິມະສິດຂອງບັນດາປະເທດສະມາຊິກ.

ດຣ ທິມໂມຕີ ອາມສະຕຣອງ ໄດ້ກວດແກ້ສິ່ງພິມ ເປັນຕົ້ນ ບັນດາບົດຄົ້ນຄວ້າ ແລະ ວາລະສານວິຊາການ ໃນຂົງເຂດລະບາດວິທະຍາດ້ານພັນທຸກຳ, ການເຝົ້າລະວັງພະຍາດ, ການທູດເພື່ອສົ່ງເສີມວຽກງານສາທາລະນະສຸກ ແລະ ການບໍລິຫານວຽກງານສາທາລະນະສຸກສາກົນ. ດຣ ທິມໂມຕີ ອາມສະຕຣອງ ຈົບການຄົ້ນຄວ້າລະດັບປະລິນຍາເອກ ໃນສາຂາລະບາດວິທະຍາດ້ານພັນທຸກຳ ແລະ ປະລິນຍາຕີວິທະຍາສາດ ໂດຍໄດ້ຮັບກຽດນິຍົມອັນດັບ 1 ໃນສາຂາວິຊາ ລະບາດວິທະຍາດ້ານພຶດຕິກຳຂອງປະຊາກອນ, ພັນທຸກຳ ແລະ ສັງຄົມ ຈາກມະຫາວິທະຍາໄລນິວອິງແລນ, ປະເທດອົດສະຕຣາລີ.

ປອ ຄຣິສໂຕເຟີ ຟິສແພດທຣິກ ເຮັດວຽກຊຸກຍູ້ຂະແໜງສາທາລະນະສຸກ ໃນ ສປປ ລາວ ໂດຍຜ່ານການພົວພັນຮ່ວມມື ແລະ ມີສ່ວນຮ່ວມ ກັບພາກສ່ວນຕ່າງໆ ເປັນຕົ້ນ ຄູ່ຮ່ວມພັດທະນາ ແລະ ຜູ້ໃຫ້ທຶນ ແລະ ຜ່ານການວາງຍຸດທະສາດ ການຈັດຕັ້ງປະຕິບັດງານພາຍໃນອົງການອະນາໄມໂລກ ປະຈຳ ສປປ ລາວ. ເພິ່ນຍັງໄດ້ປະກອບສ່ວນໃນການສ້າງຂະບວນການຮ່ວມມືພາຍໃນອົງການ ໂດຍການສົ່ງເສີມການເຮັດວຽກຮ່ວມກັນຢ່າງກົມກຽວ ລະຫວ່າງ ບັນດາແຜນງານ ແລະ ໜ່ວຍງານຕ່າງໆ 

ທ່ານ ຄຣິສໂຕເຟີ ຟິສແພດທຣິກ ໄດ້ມີປະສົບການເຮັດວຽກໃນອົງການອະນາໄມໂລກ ເກືອບ 20 ປີ ແລ້ວ ເຊິ່ງຜ່ານມາ ເພິ່ນໄດ້ຮັບໜ້າທີ່ເປັນນັກເສດຖະສາດດ້ານສາທາລະນະສຸກ ໃນ ສປປ ລາວ ສະໜັບສະໜູນກະຊວງສາທາລະນະສຸກ ໃນວຽກງານປະກັນສຸຂະພາບແຫ່ງຊາດ ແລະ ການໂຕ້ຕອບຕໍ່ການລະບາດຂອງພະຍາດໂຄວິດ-19 ໃນໄລຍະຕົ້ນໆຂອງການລະບາດ. ຫຼັງຈາກນັ້ນ, ທ່ານ ຄຣິສໂຕເຟີ ຟິສແພດທຣິກ ໄດ້ຍ້າຍໄປປະຈຳໃນປະເທດອຸດສະເບກິດສະຖານ ເປັນທີ່ປຶກສາດ້ານນະໂຍບາຍສາທາລະນະສຸກ ປະກອບສ່ວນໃນການປະຕິຮູບ ແລະ ການສ້າງຄວາມເຂັ້ມແຂງໃນວຽກງານການບໍລິການສຸຂະພາບຂັ້ນຕົ້ນ ໃນພາກພື້ນທະເລອາຣານ.

ທ່ານ ຄຣິສໂຕເຟີ ຟິສແພດທຣິກ ຍັງໄດ້ປະຈຳຢູ່ ສຳນັກງານໃຫຍ່ ອົງການອະນາໄມໂລກ ທີ່ ເຊີແນວ ເຊິ່ງຫຼ້າສຸດ ເພິ່ນໄດ້ເປັນເຮັດວຽກໃຫ້ກັບຜູ້ຊ່ວຍອະທິການບໍດີຂອງອົງການອະນາໄມໂລກ ໃນວຽກງານການປົກຄຸມສຸຂະພາບທົ່ວປວງຊົນ / ພະຍາດຕິດຕໍ່ ແລະ ບໍ່ຕິດຕໍ່ ແລະ ສຸຂະພາບຈິດ. ນອກນັ້ນ, ຍັງໄດ້ຊ່ວຍວຽກໃນຫ້ອງການຂອງອະທິການບໍດີ ອີກດ້ວຍ.

ປອ ຄຣິສໂຕເຟີ ຟິສແພດທຣິກ ໄດ້ຈົບການສຶກສາຊັ້ນປະລິນຍາໂທ ໃນສາຂາ ເສດຖະສາດ ແລະ ການເງິນ ແລະ ໄດ້ສຳເລັດການສຶກສາຊັ້ນປະລິນຍາເອກ ໃນສາຂາ ວິທະຍາສາດສຸຂະພາບ.