ສປປ ລາວ ໄດ້ເປັນເຈົ້າພາບຈັດກອງປະຊຸມປຶກສາຫາລື ການປັບປຸງລະບົບຕິດຕາມວຽກງານດ້ານໂພຊະນາການ ກັບຜູ້ຊ່ຽວຊານຈາກ 5 ປະເທດ, ບັນດາຜູ້ນຳຈາກ ສໍານັກງານໃຫຍ່ ອົງການ ຢູນິເຊັບ ແລະ ອົງການອະນາໄມໂລກ, ພະນັກງານລະດັບພາກພື້ນ ແລະ ປະເທດ, ພ້ອມທັງ ຜູ້ຕາງໜ້າຈາກ ອົງການ GIZ ເພື່ອປຶກສາຫາລືກ່ຽວກັບ ບົດບາດຂອງຂໍ້ມູນຂ່າວສານໃນການປັບປຸງໂພຊະນາການຂອງເດັກນ້ອຍ ແລະ ແມ່ຍິງ.
ກອງປະຊຸມດັ່ງກ່າວໄດ້ຈັດຂຶ້ນໂດຍ ກະຊວງສາທາລະນະສຸກ ໂດຍເປັນສ່ວນໜຶ່ງຂອງໂຄງການລິເລີ່ມໂດຍ ສະຫະພາບເອີຣົບ, ອົງການ ຢູນິເຊັບ ເເລະ ອົງການອະນາໄມໂລກ, ເພື່ອເສີມສ້າງຄວາມເຂັ້ມແຂງຂອງ ລະບົບຂໍ້ມູນຂ່າວສານດ້ານໂພຊະນາການແຫ່ງຊາດ (Strengthening National Nutrition Information Systems ຫຼື SNNIS) ເຊິ່ງແນໃສ່ການປັບປຸງຄວາມສາມາດໃນລະດັບປະເທດ ເພື່ອສ້າງຖານຂໍ້ມູນດ້ານໂພຊະນາການທີ່ມີຄຸນນະພາບ ເພື່ອສະໜັບສະໜູນນະໂຍບາຍ ແລະ ໂຄງການດ້ານໂພຊະນາການຕ່າງໆ. ໂຄງການລິເລີ່ມນີ້ ໄດ້ຈັດຕັ້ງຂຶ້ນໃນປີ 2020 ໂດຍການຮ່ວມມືກັບລັດຖະບານຂອງ 5 ປະເທດ ກໍຄື: ເອທິໂອປີ, ກົດດີວົວ, ສປປ ລາວ, ອູກັນດາ ແລະ ຊຳບີ, ແລະ ໄດ້ຮັບການສະໜັບສະໜູນດ້ານວິຊາການຈາກ ອົງການ ຢູນີເຊັບ ແລະ ອົງການອະນາໄມໂລກ ພ້ອມການສະໜັບສະໜູນດ້ານການງົບປະມານຈາກ ຄະນະກຳມາທິການເອີຣົບ.
ທ່ານ ດຣ. ຈັນສາລີ ພົມມະວົງ, ຮອງຫົວໜ້າກົມແຜນການ ແລະ ການເງິນ, ກະຊວງສາທາລະນະສຸກ, ກ່າວວ່າ: “ກອງປະຊຸມຂອງພວກເຮົາໃນມື້ນີ້ ເປັນໂອກາດອັນສຳຄັນສຳລັບ ບັນດາຜູ້ຊ່ຽວຊານດ້ານໂພຊະນາການຈາກ 5 ປະເທດ ເພື່ອປຶກສາຫາລືກ່ຽວກັບ ຄວາມຄືບໜ້າ, ສິ່ງທ້າທາຍ ແລະ ທິດທາງໃນຕໍ່ໜ້າ ກ່ຽວກັບວິທີທີ່ພວກເຮົາຈະສາມາດເກັບກຳຂໍ້ມູນຂ່າວສານດ້ານໂພຊະນາການໃຫ້ຕໍ່ເນື່ອງ ເພື່ອປັບປຸງ ການບໍລິການ, ການວາງແຜນ ແລະ ການຈັດຕັ້ງປະຕິບັດວຽກງານຕ່າງໆ ໃນຂົງເຂດນີ້. ກະຊວງສາທາລະນະສຸກ ຂໍສະແດງຄວາມຂອບໃຈມາຍັງ ອົງການ ຢູນິເຊັບ ເເລະ ອົງການອະນາໄມໂລກ ທີ່ໄດ້ໃຫ້ການສະໜັບສະໜູນ ໃນການຈັດຕັ້ງປະຕິບັດໂຄງການດັ່ງກ່າວໃນ ສປປ ລາວ ແລະ ຂອບໃຈສະຫະພາບເອີຣົບ ທີ່ໄດ້ໃຫ້ການສະໜັບສະໜູນດ້ານງົບປະມານຢ່າງຕໍ່ເນື່ອງ."
ທ່ານ ນາງ ອີນາ ມາຈູລໍນິແຕ, ເອກອັກຄະລັດຖະທູດ ສະຫະພາບເອີຣົບ ປະຈໍາ ສປປ ລາວ ໄດ້ກ່າວວ່າ: “ໂພຊະນາການ ຍັງຄົງເປັນວຽກງານບູລິມະສິດທີ່ສຳຄັນຂອງ ສະຫະພາບເອີຣົບ ແລະ ໂຄງການ SNNIS ເປັນສ່ວນໜຶ່ງຂອງການສະໜັບສະໜູນຂອງ ສະຫະພາບເອີຣົບ ຕໍ່ກັບ ລັດຖະບານ ເເຫ່ງ ສປປ ລາວ ເພື່ອແກ້ໄຂບັນຫາການຂາດສານອາຫານໃນທຸກຮູບແບບ. ການເກັບກຳ ແລະ ນໍາໃຊ້ຂໍ້ມູນຂ່າວສານເເບບຕໍ່ເນື່ອງ ແລະ ທັນເວລາ ແມ່ນສໍາຄັນທີ່ສຸດຕໍ່ການຕັດສິນໃຈ ແລະ ຈັດວາງຊັບພະຍາກອນທີ່ມີຢູ່ໃນວຽກງານໂພຊະນາການ ເພື່ອໃຫ້ບັນລຸຜົນໄດ້ຮັບສູງສຸດ."
ນອກຈາກນັ້ນ, ຄະນະການນຳທີ່ເຂົ້າຮ່ວມກອງປະຊຸມ, ເຊິ່ງປະກອບດ້ວຍ ພະນັກງານຈາກສໍານັກງານໃຫຍ່ ເເລະ ຫ້ອງການພາກພື້ນຂອງ ອົງການ ຢູນິເຊັບ ແລະ ອົງການອະນາໄມໂລກ, ຍັງໄດ້ມີໂອກາດໄປຢ້ຽມຢາມສຸກສາລາ ທີ່ ແຂວງຫຼວງພະບາງ ເພື່ອຕິດຕາມການສະໜັບສະໜູນພາຍໃຕ້ ໂຄງການ SNNIS ແລະ ຜົນໄດ້ຮັບຂອງໂຄງການຕໍ່ການປັບປຸງການເກັບກຳຂໍ້ມູນຂ່າວສານ ແລະ ການໃຫ້ບໍລິການດ້ານໂພຊະນາການທ້ອງຖິ່ນ.
ທ່ານ Arturo Romboli, ຮອງຜູ້ຕາງໜ້າ ອົງການ ຢູນິເຊັບ ປະຈຳ ສປປ ລາວ, ໄດປະກອບຄຳເຫັນວ່າ: “ຍ້ອນການແຜ່ລະບາດຂອງພະຍາດໂຄວິດ-19 ແລະ ວິກິດການເສດຖະກິດໃນທົ່ວໂລກ, ຫຼາຍໆປະເທດກໍາລັງປະເຊີນກັບສິ່ງທ້າທາຍເພີ່ມເຕີມ ເຊິ່ງອາດຈະເຮັດໃຫ້ຄວາມຄືບໜ້າ ທີ່ພວກເຮົາໄດ້ສ້າງເອົາໄວ້ໃນຊຸ່ມທົດສະວັດທີ່ຜ່ານມາ ໃນການເເກ້ໄຂບັນຫາການຂາດສານອາຫານ ຕ້ອງຕົກຢູ່ໃນພາວະຄວາມສ່ຽງ. ໃນປະຈຸບັນ ພວກເຮົາຕ້ອງຈັດລຳດັບຄວາມສຳຄັນໃນວຽກງານໂພຊະນາການໃຫ້ດີ ເພື່ອຮັບປະກັນວ່າ ຊັບພະຍາກອນທັງໝົດໄດ້ຖືກນຳໃຊ້ຢ່າງມີປະສິດທິຜົນທີ່ສຸດ ເພື່ອບັນລຸຜົນສຳລັບເດັກນ້ອຍທຸກຄົນ ແລະ ເພື່ອເຮັດສິ່ງນີ້, ຂໍ້ມູນຂ່າວສານແມ່ນມີຄວາມສໍາຄັນຫຼາຍ ລວມເຖິງໂຄງການ SNNIS ຮ່ວມຂອງພວກເຮົາ."
ທ່ານ ດຣ Achala Upendra Jayatilleke, ວິຊາການລະບົບຂໍ້ມູນຂ່າວສານດ້ານສຸຂະພາບ ຈາກ ອົງການອະນາໄມໂລກ ປະຈຳ ສປປ ລາວ, ກໍໄດ້ກ່າວວ່າ: “ການເສີມສ້າງຄວາມສາມາດໃນການເກັບກຳຂໍ້ມູນດ້ານໂພຊະນາການຢ່າງຕໍ່ເນື່ອງ ແມ່ນກຸນແຈສຳຄັນສຳລັບການປັບປຸງໂພຊະນາການ. ໃນຖານະຜູ້ສະໜັບສະໜູນວຽກງານພັດທະນາລະບົບຂໍ້ມູນຂ່າວສານດ້ານສຸຂະພາບ, ໂພຊະນາການ ແລະ ສຸຂະພາບຂອງແມ່ ໃນ ສປປ ລາວ ມາເປັນເວລາຫຼາຍປີ, ການປັບປຸງການເຊື່ອມໂຍງລະຫວ່າງການເກັບກຳຂໍ້ມູນຂ່າວສານ ແລະ ການນໍາໃຊ້ພວກມັນໃຫ້ມີປະສິດທິພາບຂຶ້ນນັ້ນແມ່ນມີຄວາມສໍາຄັນທີ່ສຸດຕໍ່ການຍົກສູງສຸຂະພາບຂອງເດັກນ້ອຍ, ແມ່ ແລະ ຄອບຄົວ. ໂຄງການ SNNIS ໃນ ສປປ ລາວ ເຊິ່ງນຳພາໂດຍ ກະຊວງສາທາລະນະສຸກ ໄດ້ນຳໃຊ້ລະບົບຖານຂໍ້ມູນດ້ານສຸຂະພາບ ທີ່ມີຢູ່ໃນປະເທດມາກ່ອນ ກໍຄື DHIS-2 ເພື່ອເປັນເເບບຖານສໍາລັບໂຄງການດັ່ງກ່າວ, ເຊິ່ງເປັນລະບົບທີ່ ກະຊວງສາທາລະນະສຸກ ແລະ ອົງການອະນາໄມໂລກ ໄດ້ຮ່ວມສ້າງຕັ້ງຂື້ນໃນປີ 2013 ແລະ ປັດຈຸບັນເເມ່ນໄດ້ຂະຫຍາຍການນຳໃຊ້ໄປທົ່ວປະເທດ ເປັນລະບົບຖານຂໍ້ມູນສຸຂະພາບທີ່ເຊື່ອມຕໍ່ກັບສູນກາງ. ອົງການອະນາໄມໂລກ ຮ່ວມກັບ ອົງການ ຢູນິເຊັບ ຢ້ຳຄືນວ່າຈະສືບຕໍ່ສະໜັບສະໜູນ ກະຊວງສາທາລະນະສຸກ ໃນການປັບປຸງການການເກັບກຳ ເເລະ ພັດທະນາຖານຂໍ້ມູນ ເພື່ອນໍາໃຊ້ເຂົ້າໃນການຕັດສິນໃຈ ກ່ຽວກັບ ວຽກງາານໂພຊະນາການຕ່າງໆໃນ ສປປ ລາວ."