ການຂາດແຄນອາຫານ ແລະ ນ້ຳ ແລະ ອັນຕະລາຍຂອງຄວາມຮ້ອນສຳລັບກຸ່ມທີ່ມີຄວາມສ່ຽງ ອາດຈະເປັນສິ່ງທ້າທາຍດ້ານສຸຂະພາບດ້ານການປ່ຽນແປງດິນຟ້າອາກາດອັນດັບຕົ້ນໆຂອງ ສປປ ລາວ. ພາກສ່ວນກຳນົດນະໂຍບາຍ ກ່ຽວກັບ ວຽກງານສາທາລະນະສຸກ ໄດ້ເຂົ້າຮ່ວມກອງປະຊຸມ ແລະ ຮັບຟັງການລາຍງານ ທີ່ນະຄອນຫຼວງວຽງຈັນ ເດືອນກໍລະກົດ ປີ 2023 ທີ່ຜ່ານມາ.
ຜູ້ຊ່ຽວຊານດ້ານສາທາລະນະສຸກ ແລະ ຜູ້ບໍລິຫານໂຄງການ, ຜູ້ກຳນົດນະໂຍບາຍ, ນັກວິຊາການ ແລະ ຕາງໜ້າຈາກບັນດາຄູ່ຮ່ວມພັດທະນາ ຫຼາຍກວ່າ 65 ທ່ານ ໄດ້ເຂົ້າຮ່ວມກອງປະຊຸມຝຶກອົບຮົມເປັນເວລາ 2 ວັນ, ເຊິ່ງກອງປະຊຸມຈັດຂຶ້ນໂດຍກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກ ແລະ ອົງການອະນາໄມໂລກ (WHO) ປະຈຳ ສປປ ລາວ ກ່ຽວກັບຜົນກະທົບຂອງການປ່ຽນແປງດິນຟ້າອາກາດຕໍ່ສຸຂະພາບ, ກຸ່ມທີ່ມີຄວາມສ່ຽງສູງ ແລະ ການປັບຕົວທີ່ເປັນບູລິມະສິດ.
ໃນລະຫວ່າງການຝຶກອົບຮົມ, ຜູ້ເຂົ້າຮ່ວມໄດ້ປຶກສາຫາລື ແລະ ສ້າງແຜນການຈັດຕັ້ງປະຕິບັດ 6 ຂົງເຂດການປັບຕົວທີ່ເປັນບູລິມະສິດຂອງແຜນປັບຕົວສຸຂະພາບແຫ່ງຊາດ (HNAP): ການວາງແຜນ, ການນໍາພາ ແລະ ການຄຸ້ມຄອງ, ຄວາມສ່ຽງຕໍ່ນ້ຳ, ສຸຂະອະນາໄມ ແລະ ສິ່ງເສດເຫຼືອໃນສະຖານທີ່ບໍລິການສຸຂະພາບ, ເງື່ອນໄຂທາງການແພດທີ່ເກີດຈາກຄວາມຮ້ອນ, ຄວາມບໍ່ໝັ້ນຄົງດ້ານສະບຽງອາຫານ ແລະ ການຂາດສານອາຫານ, ການຄຸ້ມຄອງຄວາມຕ້ອງການດ້ານສຸຂະພາບເພີ່ມຂຶ້ນສໍາລັບການບາດເຈັບທີ່ເກີດຈາກດິນຟ້າອາກາດທີ່ຮ້າຍແຮງ ແລະ ຄາດຄະເນການເພີ່ມຂຶ້ນຂອງພະຍາດທີ່ເກີດຈາກພາຫະນະນຳເຊື້ອ, ໂດຍສະເພາະແມ່ນພະຍາດໄຂ້ເລືອດອອກ. ແຜນການຈັດຕັ້ງປະຕິບັດຈະໄດ້ລວມເຂົ້າໃນແຜນຈັດຕັ້ງປະຕິບັດປີ 2023-2024.
ສປປ ລາວ ມີຄວາມສ່ຽງຕໍ່ການປ່ຽນແປງຂອງດິນຟ້າອາກາດ, ໂດຍຄາດຄະເນວ່າຈະມີອາກາດຮ້າຍແຮງຂຶ້ນ, ອຸນຫະພູມຈະເພີ່ມຂຶ້ນ 2-3° C ໃນປີ 2050 ແລະ ຈະມີປະລິມານນ້ຳຝົນເພື່ມຂຶ້ນໃນລະດັບ 10-30%ໂດຍສະເພາະພາກໃຕ້.
ລະບົບກະສິກຳ ແລະ ສະບຽງອາຫານ ກໍຖືກຄຸກຄາມ, 70% ຂອງປະຊາກອນໃນ ສປປ ລາວ ແມ່ນອາໄສການຜະລິດກະສິກຳ ເຊິ່ງມີຄວາມສ່ຽງຕໍ່ການປ່ຽນແປງດິນຟ້າອາກາດ ແລະ ໄພພິບັດຕ່າງໆ ແລະ ຄວາມບໍ່ໝັ້ນຄົງດ້ານສະບຽງອາຫານອາດເຮັດໃຫ້ເດັກນ້ອຍຖືກອົດອາຫານ ຫຼື ມີການຈໍາກັດດ້ານອາຫານ ນໍາໄປສູ່ການຂາດສານອາຫານເພີ່ມຂຶ້ນ ແລະ ບັນຫາສຸຂະພາບກໍຈະຕາມມາ.
ອຸນຫະພູມທີ່ເພີ່ມຂຶ້ນຈະເຮັດໃຫ້ເກີດຄວາມກົດດັນດ້ານຄວາມຮ້ອນ, ເຮັດໃຫ້ເກີດບັນຫາທາງສຸຂະພາບຫຼາຍຢ່າງ, ລວມທັງການເສຍຊີວິດຍ້ອນຄວາມຮ້ອນໃນກຸ່ມຜູ້ສູງອາຍຸ ແລະ ຄວາມສ່ຽງຕໍ່ເດັກນ້ອຍ ແລະ ຜູ້ທີ່ເຮັດວຽກກາງແຈ້ງ.
ດຣ ບົວແກ້ວ ສຸວັນທອງ, ຮອງຫົວໜ້າກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກ ໄດ້ກ່າວວ່າ: ຍຸດທະສາດ ແລະ ການວາງແຜນໃນທຸກລະດັບ, ການປະສານງານ ແລະ ການຕິດຕາມ ໃນລະດັບສູນກາງ ແລະ ທ້ອງຖິ່ນແມ່ນມີຄວາມສຳຄັນຕໍ່ການປົກປ້ອງສຸຂະພາບຈາກການປ່ຽນແປງດິນຟ້າອາກາດ.
ດຣ ບຸນຖະໜອມ ພິມມະສອນ, ຮອງຫົວໜ້າພະແນກການຄຸ້ມຄອງອະນາໄມ, ກົມອະນາໄມ ແລະ ສົ່ງເສີມສຸຂະພາບ ໄດ້ສະ ເໜີໃຫ້ທຸກພາກສ່ວນລວມທັງຂະແໜງສາທາລະນະສຸກ, ກະສິກຳ, ສິ່ງແວດລ້ອມ, ຄົມມະນາຄົມ-ຂົນສົ່ງ ຕ້ອງໄດ້ມີການເຮັດວຽກຮ່ວມກັນ ເພື່ອປົກປ້ອງສຸຂະພາບຂອງປະຊາຊົນ ແລະ ຫຼີກລ້ຽງການເພີ່ມຄວາມກົດດັນໃຫ້ແກ່ລະບົບສາທາລະນະສຸກ.
ພາຍຫຼັງຊຸດຝຶກອົບຮົມສຳເລັດຜົນ, ຈະໄດ້ນຳໃຊ້ຄູ່ມື ຄຸນນະພາບອາກາດ, ນ້ຳ, ສຸຂາພິບານ, ໂພຊະນາການ, ການຄຸ້ມຄອງໄພພິບັດ ແລະ ສຸຂະພາບສິ່ງແວດລ້ອມ ເຂົ້າໃນຫຼັກສູດການຮຽນການສອນໃນມະຫາວິທະຍາໄລວິທະຍາສາດສຸຂະພາບ ໃນ ສປປ ລາວ.