ລັດຖະມົນຕີກະຊວງສາທາລະນະສຸກ ຄົນໃໝ່ ໄດ້ຕ້ອນຮັບການເຂົ້າຢ້ຽມຂ່ຳນັບຂອງຜູ້ຕາງໜ້າອົງການອະນາໄມໂລກ ປະຈຳ ສປປ ລາວ

ມື້ນີ້, ທ່ານ ນາງ ໃບຄໍາ ຂັດທິຍະ, ລັດຖະມົນຕີກະຊວງສາທາລະນະສຸກ ຄົນໃໝ່ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ດຣ ທິມໂມຕີ ອາມສະຕຣອງ, ຜູ້ຕາງໜ້າອົງການອະນາໄມໂລກ ປະຈຳ ສປປ ລາວ ພ້ອມດ້ວຍບັນດາຄະນະກົມຈາກກະຊວງສາທາລະນະສຸກ ແລະ ວິຊາການຈາກອົງການອະນາໄມໂລກ ປະຈຳ ສປປ ລາວ.

ທ່ານ ນາງ ໃບຄຳ ຂັດທິຍະ ໄດ້ຕີລາຄາສູງຕໍ່ການສະໜັບສະໜູນຮ່ວມມືຂອງອົງການອະນາໄມໂລກ ທີ່ໄດ້ເປັນຄູ່ຮ່ວມພັດທະນາອັນເຂັ້ມແຂງຂອງ ລັດຖະບານ ແຫ່ງ ສປປ ລາວ ມາເປັນເວລາຫຼາຍທົດສະວັດ, ພ້ອມທັງໄດ້ ສະແດງຄວາມຍ້ອງຍໍຊົມເຊີຍຕໍ່ວຽກງານທີ່ໄດ້ຈັດຕັ້ງປະຕິບັດຮ່ວມກັນຜ່ານມາ ເປັນຕົ້ນແມ່ນ ວຽກງານການສ້າງຄວາມເຂັ້ມແຂງໃຫ້ແກ່ລະບົບສາທາລະນະສຸກ ແລະ ການບໍລິການດ້ານສາທາລະນະສຸກ ຕະຫຼອດຮອດວຽກງານຊຸກຍູ້ສຸຂະພາບຂອງປະຊາຊົນບັນດາເຜົ່າໃນຂອບເຂດທົ່ວປະເທດ.

ທ່ານ ນາງ ໃບຄຳ ຂັດທິຍະ ໄດ້ກ່າວວ່າ: “ພວກເຮົາຂໍຂອບໃຈຕໍ່ການສະໜັບສະໜູນອັນສະເໝີຕົ້ນສະເໝີປາຍຂອງອົງການອະນາໄມໂລກ ໃນທຸກຂົງເຂດວຽກງານຂອງຂະແໜງສາທາລະນະສຸກ ແລະ ຂະແໜງອ້ອມຂ້າງ. ການຮ່ວມມືຂອງກະຊວງສາທາລະນະສຸກ ແລະ ອົງການອະນາໄມໂລກ ຖືວ່າເປັນກຳລັງແຮງອັນສຳຄັນໃນການປັບປຸງ ຊຸກຍູ້ໃຫ້ປະຊາຊົນທຸກຄົນມີສຸຂະພາບດີ ທັງຍັງໄດ້ກອບກູ້ຊີວິດຂອງປະຊາຊົນຫຼາຍລ້ານຄົນ ແລະ ຊ່ວຍຮັບປະກັນໃຫ້ພໍ່ແມ່ປະຊາຊົນ, ຄອບຄົວ ແລະ ຊຸມຊົນ ມີສຸຂະພາບແຂງແຮງຂຶ້ນກວ່າເກົ່າ. ພວກເຮົາຫວັງຢ່າງຍິ່ງວ່າ ຈະໄດ້ສືບຕໍ່ເຮັດວຽກຮ່ວມກັນໃຫ້ເກີດໝາກອອກຜົນຫຼາຍຂຶ້ນ ໃນຕໍ່ໜ້າ.”

ເປັນເວລາ 75 ປີ ໃນການເປັນສະມາຊິກຂອງອົງການອະນາໄມໂລກ, ສປປ ລາວ ໄດ້ມີຜົນງານເອັນພົ້ນເດັ່ນຫຼາຍຢ່າງໃນວຽກງານສາທາລະນະສຸກ ເປັນຕົ້ນ ການໂຕ້ຕອບຕໍ່ການແຜ່ລະບາດຂອງພະຍາດໂຄວິດ-19, ການລົບລ້າງພະຍາດຂາຊ້າງ ແລະ ຕາສານ, ການລົບລ້າງພະຍາດໄຂ້ມາລາເຣຍກໍໃກ້ສຳເລັດແລ້ວ ແລະ ອັດຕາການເສຍຊີວິດຂອງແມ່ຍິງໃນລະຫວ່າງການເກີດລູກກໍຫຼຸດລົງເຖິງ 82% ໃນໄລຍະ ປີ 2000 ຫາ 2023. ໃນນີ້, ອົງການອະນາໄມໂລກ ຍັງໄດ້ໃຫ້ການສະໜັບສະໜູນໃນວຽກງານດ້ານນະໂຍບາຍ ແລະ ນິຕິກຳ ເພື່ອຊຸກຍູ້ການຈັດຕັ້ງປະຕິບັດບັນດາວຽກງານກິດຈະກໍາທີ່ຊ່ວຍໃນການຮັກສາສຸຂະພາບ ແລະ ຊ່ວຍຊີວິດຂອງປະຊາຊົນ.

ໃນການຢ້ຽມຂ່ຳນັບຄັ້ງນີ້, ທ່ານ ນາງ ໃບຄຳ ຂັດທິຍະ ແລະ ດຣ ທິມໂມຕີ ອາມສະຕຣອງ ໄດ້ປຶກສາຫາລືການຮ່ວມມື ກ່ຽວກັບ ບັນຫາດ້ານສາທາລະນະສຸກທີ່ຍັງຄົງຄ້າງ ລວມທັງວຽກງານການໃຫ້ວັກຊີນກັນພະຍາດ, ການໂຕ້ຕອບຕໍ່ການລະບາດ ແລະ ການລົບລ້າງພະຍາດຕ່າງໆ ພ້ອມທັງບັນດາສິ່ງທ້າທາຍທີ່ນັບມື້ນັບຮ້າຍແຮງຂຶ້ນ ເຊັ່ນ ການປ່ຽນແປງດິນຟ້າອາກາດ, ພະຍາດບໍ່ຕິດຕໍ່ (NCD) ແລະ ງົບປະມານຂອງຂະແໜງສາທາລະນະສຸກທີ່ມີຈຳກັດ.

ດຣ ທິມໂມຕີ ອາມສະຕຣອງ ໄດ້ກ່າວວ່າ: “ອົງການອະນາໄມໂລກ ມີຄວາມພາກພູມໃຈເປັນຢ່າງສູງທີ່ໄດ້ເຮັດວຽກຄຽງບ່າຄຽງໄຫຼ່ກັບ ລັດຖະບານ ແຫ່ງ ສປປ ລາວ ແລະ ທີມງານທີ່ມີຄວາມທຸ່ມເທຢ່າງເຂັ້ມແຂງ ຈາກກະຊວງສາທາລະນະສຸກ ເພື່ອຊຸກຍູ້ໃຫ້ວຽກງານສາທາລະນະສຸກໃຫ້ມີຄວາມຄືບໜ້າ ແລະ ສືບຕໍ່ແກ້ໄຂຂໍ້ຄົງຄ້າງ ແລະ ສິ່ງທ້າທາຍຕ່າງໆ.”

ຜູ້ຕາງໜ້າອົງການອະນາໄມໂລກ ຍັງໄດ້ກ່າວຕື່ມອີກວ່າ: “ພວກເຮົາຈະສືບຕໍ່ຮັກສາສາຍພົວພັນຮ່ວມມືອັນສຳຄັນນີ້ ແລະ ສະໜັບສະໜູນທຸກວຽກງານທີ່ແນໃສ່ໃຫ້ປະຊາຊົນລາວມີສຸຂະພາບດີທຸກຄົນ, ໂດຍສະເພາະ ຊຸກຍູ້ໃຫ້ມີການຈັດສັນງົບປະມານໃຫ້ແກ່ຂະແໜງສາທາລະນະສຸກ ຢ່າງໜ້ອຍບໍ່ຫຼຸດ 9% ຂອງງົບປະມານລວມຂອງລັດທັງໝົດ ແລະ ຄົ້ນຄວ້າຫາວິທີທາງໃນການສ້າງໃຫ້ມີລາຍຮັບເພີ່ມ ເປັນຕົ້ນ ຜ່ານອາກອນສຸຂະພາບ ຈາກຜະລິດຕະພັນຢາສູບ ແລະ ຜະລິດຕະພັນອື່ນໆ ທີ່ສົ່ງຜົນກະທົບຕໍ່ສຸຂະພາບ. ພວກເຮົາຫວັງຢ່າງຍິ່ງວ່າ ຈະໄດ້ສືບຕໍ່ສ້າງຜົນສຳເລັດຮ່ວມກັນ ພາຍໃຕ້ການຊີ້ນໍານຳພາທີ່ເຂັ້ມແຂງ ຂອງທ່ານລັດຖະມົນຕີ.”

ໃນ ສປປ ລາວ, ອົງການອະນາໄມໂລກ ໄດ້ມີການຮ່ວມມືກັບກະຊວງສາທາລະນະສຸກ ແລະ ບັນດາກະຊວງອື່ນທີ່ກ່ຽວຂ້ອງຢ່າງກວ້າງຂວາງ ເພື່ອແກ້ໄຂບັນຫາສິ່ງທ້າທາຍ ດ້ານສາທາລະນະສຸກ. ຍ້ອນຜົນກະທົບຂອງການປ່ຽນແປງດິນຟ້າອາກາດ, ບັນຫາທ້າທາຍທາງເສດຖະກິດ ແລະ ຜົນກະທົບໄລຍະຍາວຈາກການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ ສປປ ລາວ ກໍຄືປະຊາຊົນທຸກຄົນ ມີຄວາມອ່ອນໄຫວເປັນພິເສດ. ສະນັ້ນ, ອົງການອະນາໄມໂລກ ຈຶ່ງໄດ້ສຸມໃສ່ການສົ່ງເສີມລະບົບສາທາລະນະສຸກທີ່ມີຄວາມຍືນຍົງ ແລະ ໝັ້ນຄົງ, ການປົກປ້ອງຊຸມຊົນຈາກພະຍາດຕ່າງໆ ແລະ ເຫດສຸກເສີນທາງສາທາລະນະສຸກ ແລະ ການປົກປ້ອງສຸຂະພາບຂອງປະຊາຊົນຈາກການປ່ຽນແປງດິນຟ້າອາກາດ ແລະ ໄພຂົ່ມຂູ່ຈາກສິ່ງແວດລ້ອມ.