ການຊົມໃຊ້ຢາສູບເຮັດໃຫ້ສູນເສຍມູນຄ່າເຖິງ 3.6 ຕື້ກີບ, ແຕ່ລະປີຄົນເສຍຊີວິດຍ້ອນພະຍາດທີ່ເກີດຈາກຢາສູບປະມານ 6.800 ຄົນ ໃນ ສປປ ລາວ - ແລະ ການເສຍຊີວິດດັ່ງກ່າວສາມາດປ້ອງກັນໄດ້ - ກ່າວໂດຍທິມງານຜູ້ຊ່ຽວຊານທາງດ້ານສຸຂະພາບຈາກພາກພື້ນ ແລະ ສາກົນ ທີ່ໄດ້ມາຢ້ຽມຢາມນະຄອນຫຼວງວຽງຈັນອາທິດນີ້ເພື່ອປຶກສາຫາລືມາດຕະການຄວບຄຸມຢາສູບ ທີ່ຮັດກຸ່ມ ແລະ ມີປະສິດທິພາບ. ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ແມ່ນເພື່ອສະໜັບສະໜູນ ການຈັດຕັ້ງປະຕິບັດກົດໝາຍວ່າດ້ວຍການຄວບຄຸມຢາສູບ ທີ່ຖືກປັບປຸງໃຫ້ສອດຄ່ອງກັບ ສົນທິສັນຍາສາກົນ ວ່າດ້ວຍການຄວບຄຸມຢາສູບ (ຫຼື WHO FCTC).
ການເຮັດວຽກຮ່ວມກັບກັບ ກະຊວງສະທາລະນະສຸກ ແລະ ບັນດາກະຊວງທີ່ກ່ຽວຂ້ອງ, ທິມງານຊ່ຽວຊານດັ່ງກ່າວໃນປະຊູມກັບພາກສວນທີ່ກ່ຽວຂ້ອງເພື່ອຫາລືວຽກງານຄວບຄຸມຢາສູບທີ່ກ່ຽວພັນກັບອາກອນຢາສູບ, ລະບຽບການທີ່ກ່ຽວພັນກັບອຸດສາຫະກຳຢາສູບ, ຢາສູບຮູບແບບໃໝ່ ລວມທັງຢາສູບໄຟຟ້າ, ການສື່ສານເພື່ອສຸຂະພາບ, ການຮ່ວມມືກັນລະຫວ່າງຂະແໜງການຕ່າງໆ, ການຫຸ້ມຫໍ່ ແລະ ການຕິດສະຫຼາກ ຜະລິດຕະພັນຢາສູບ.
ໃຫ້ການຕ້ອນຮັບໂດຍຮອງລັດຖະມົນຕີ, ກະຊວງສາທາລະນະສຸກ ດຣ. ສະໜອງ ທອງສະນະ ແລະ ທ່ານໄດ້ກ່າວວ່າ: ກະຊວງໄດ້ໃຫ້ຄຳໝັ້ນສັນຍາຢ່າງເຕັມທີ່ ໃນການຈັດຕັ້ງປະຕິບັດພັນທະຂອງ ສປປ ລາວ ຕໍ່ສົນທິສັນຍາສາກົນ ວ່າດ້ວຍການຄວບຄຸມຢາສູບ (WHO FCTC) ໂດຍການເພີ່ມທະວີການປະຕິບັດກົດໝາຍ ແລະ ນະໂຍບາຍຄວບຄຸມຢາສູບ ແລະ ຮັບປະກັນວ່າກົດໝາຍ ແລະ ບັນດານະໂຍບາຍຖືກຈັດຕັ້ງປະຕິບັດຢ່າງເຂັ້ມງວດ, ໜຶ່ງຊີວິດແມ່ນມີຄຸນຄ່າອັນເຫຼືອລົ້ນ ແລະ ບໍ່ສົມຄວນເສຍຊີວິດຈາກພະຍາດທີ່ເກີດຈາກຢາສູບ. ພວກເຮົາໄດ້ເຮັດວຽກຢ່າງໜັກເພື່ອຄົ້ນຄວ້າ ແລະ ຊອກຫາວິທີທາງທີ່ດີເພື່ອແກ້ໄຂບັນຫາຜະລິດຕະພັນຢາສູບຮູບແບບໃໝ່, ຫຼຸດຜ່ອນ ການສາມາດເຂົ້າເຖິງ ແລະ ການນຳໃຊ້ ແລະ ເພີ່ມທະວີການບັງຂັບໃຊ້ບັນດາມາດຕະການ ຄວບຄຸມຢາສູບເພື່ອປົກປ້ອງຊຸມຊົນຂອງພວກເຮົາ ແລະ ສະໜັບສະໜູນການບັນລຸເປົ້າໝາຍການພັດທະນາແບບຍືນຍົງຂອງສະຫະປະຊາຊາດ.
ຫົວຂໍ້ທີ່ສຳຄັນແມ່ນບົດລາຍງານກ່ຽວກັບການຄວບຄຸມຢາສູບ/ກໍລະນີສຶກສາ ການຈັດຕັ້ງປະຕິບັດ ສົນທິສັນຍາສາກົນ ວ່າດ້ວຍການຄວບຄຸມຢາສູບ ທີ່ເຮັດການສຶກສາຮ່ວມກັນຂອງອົງການຂອງທິມງານຊ່ຽວ ໂດຍການຮ່ວມມືກັບ ກະຊວງສາທາລະນະສຸກ. ຜົນການສຶກສາໄດ້ກຳນົດທິດທາງ ແລະ ວິທີການຫຼີກລ້ຽງທີ່ຈະສູນເສຍທາງເສດຖະກິດ ແລະ ສຸຂະພາບ ທີ່ມີມູນຄ່າສູງເຖິງ 10 ພັນຕື້ກີບໃນໄລຍະ 15 ປີຕໍ່ໜ້າ ດ້ວຍຄວາມພະຍາຍາມໃນການຄວບຄຸມຢາສູບທີ່ເຂັ້ມງວດ ແລະ ມີປະສິດທິພາບ ແລະ ວິທີແກ້ໄຂອຸປະສັກຕ່າງໆ ທີ່ສ້າງຂຶ້ນໂດຍອຸດສາຫະກຳຢາສູບ.
ທ່ານ ນາງ Kete Lannan, ນັກກົດໝາຍອາວຸໂສ ຈາກກອງເລຂາສົນທິສັນຍາສາກົນ ວ່າດ້ວຍການຄວບຄຸມຢາສູບ ໄດ້ເນັ້ນບາງບັນຫາທ້າທາຍທີ່ພົບ ດັ່ງຕໍ່ໄປນີ້:
“ສປປ ລາວ ມີອັດຕາອາກອນຢາສູບຕໍ່າສຸດໃນບັນດາປະເທດອາຊຽນ ແລະ ໃນພາກພື້ນປາຊີຟິກຕາເວັນຕົກຂອງອົງການອະນາໄມໂລກ. ພວກເຮົາຮູ້ນຳກັນວ່າການຂຶ້ນລາຄາຢາສູບໃຫ້ແພງຂຶ້ນ ເປັນມາດຕະການທີ່ມີປະສິດຕິພາບໃນການຫຼຸດຜ່ອນການສູບຢາ, ມາດຕະການທາງດ້ານລາຄາ ແລະ ອາກອນ ຍັງສາມາດປົກປ້ອງສັງຄົມລາວ ຈາກການເປັນພະຍາດຮ້າຍແຮງທີ່ເກີດຈາກຢາສູບ, ການເສຍຊີວິດກ່ອນໄວອັນຄວນ ແລະ ຍັງເປັນມາດຕະການທີ່ດີໃນການເພີ່ມລາຍຮັບໃຫ້ແກ່ລັດຖະບານຕື່ມອີກ.”
“ໃນປີ 2016, ສປປ ລາວ ໄດ້ອອກຂໍ້ຕົກລົງຂອງລັດຖະມົນຕີ, ກະຊວງສາທາລະນະສຸກ ກ່ຽວກັບຄຳເຕືອນສຸຂະພາບທີ່ເປັນຮູບພາບ ໃສ່ຊອງ ແລະ ຕຸດຢາສູບ. ບໍລິສັດຢາສູບທັງຫຼາຍໄດ້ພະຍາຍາມທວງດຶງ ແລະ ແກ່ຍາວເວລາການຈັດຕັ້ງປະຕິບັດຄຳເຕືອນດັ່ງກ່າວ—ຊຶ່ງເປັນຍຸດທະວິທີຂອງບັນດາບໍລິສັດຢາສູບໃນທົ່ວໂລກໃນການຂັດຂວາງການປະຕິບັດມາດຕະການຄວບຄຸມຢາສູບທີ່ມີປະສິດທິພາບ. ພວກເຮົາຈຳເປັນຕ້ອງປະຕິບັດບັນດາມາດຕະການສຳຄັນເຫຼົ່ານີ້ໂດຍປາສະຈາກຄວາມຊັກຊ້າ ເຊັ່ນວ່າ: ການຫຸ້ມຫໍ່ຊອງ ແລະ ຕຸດ ຢາສູບທີ່ເປັນມາດຕະຖານ ຕາມການກຳນົດຂອງກົດໝາຍວ່າດ້ວຍການຄວບຄຸມຢາສູບແຫ່ງຊາດ ເພື່ອຊ່ວຍຮັກສາຊີວິດ.”
“ໃນຂະນະທີ່ ສປປ ລາວ ໄດ້ກ້າວເຂົ້າສູ່ບາດກ້າວອັນສຳຄັນຂອງການເປັນໜຶ່ງໃນຫຼາຍກວ່າ 30 ປະເທດທົ່ວໂລກ ໃນການຫ້າມຂາຍຜະລິດຕະພັນຢາສູບ ລວມທັງຢາສູບໄຟຟ້າ, ຜະລິດຕະພັນຢາສູບດັ່ງໄດ້ຖືກຂາຍຜ່ານສື່ສັງຄົມອອນລາຍ ແລະ ສາມາດເຂົ້າເຖິງຢ່າງງ່າຍດາຍ ລວມທັງ ເດັກນ້ອຍ ແລະ ໄວໜຸ່ມທີ່ເຂົ້າໃຈຜິດກັນວ່າເປັນຜະລິດຕະພັນຢາສູບທັນສະໄໝ. ແຕ່ຫນ້າເສຍດາຍ, ຜະລິດຕະພັນເຫຼົ່ານີ້ເປັນການຫຼອກລວງຫຼາຍຜູ້ຊົມໃຊ້ - ເປັນອັນຕະລາຍຕໍ່ສຸຂະພາບຢ່າງຮ້າຍແຮງ ແລະ ມີຄວາມສ່ຽງຕໍ່ການຕິດ ສານນິໂກຕິນ ສຳລັບຄົນລຸ້ນໃໝ່.
ທ່ານ ນາງ Ying-Ru Lo, ຜູ້ຕາງໜ້າອົງການອະນາໄມໂລກ ໄດ້ກ່າວວ່າ: “ມີຂໍ້ມູນຊີ້ໃຫ້ເຫັນຢ່າງຈະແຈ້ງວ່າ: ການສູບຢາເຮັດໃຫ້ຄົນເສຍຊີວິດເກືອບ 10 ເທົ່າ ເມື່ອທຽບກັບການເສຍຊີວິດຂອງການເກີດອຸບັດຕິເຫດຕາມທ້ອງຖະໜົນໃນ ສປປ ລາວ ໃນແຕ່ລະປີ. ການເສຍຊີວິດຍ້ອນພະຍາດທີ່ເກີດຈາກຢາສູບ ເກືອບ 7,000 ຄົນ ນັ້ນ ເຂົ່ເຈົ້າເປັນ ພໍ່, ແມ່, ພໍ່ເຖົ້າ, ແມ່ເຖົ້າ ແລະ ລູກຫຼານຂອງພວກເຮົາທັງໝົດ.”
“ສປປ ລາວ ມີຄວາມຄືບໜ້າຢ່າງໃຫຍ່ຫຼວງ ແລະ ສາມາດຮັບປະກັນຜົນປະໂຫຍດດ້ານສຸຂະພາບ ແລະ ເສດຖະກິດຢ່າງມະຫາສານ ດ້ວຍການຄວບຄຸມຢາສູບທີ່ເຂັ້ມງວດ – ແລະ ພວກເຮົາມີຄວາມພາກພູມໃຈທີ່ຈະສືບຕໍ່ໃຫ້ການສະໜັບສະໜູນກະຊວງສາທາລະນະສຸກໃນຄວາມພະຍາຍາມຄວບຄຸມຢາສູບ. ຄວາມພະຍາຍາມດັ່ງກ່າວນີ້ມັນຮຽກຮ້ອງໃຫ້ມີການຮ່ວມມືກັນຂອງຫຼາຍຂະແໜງການ, ລວມທັງ ພາສີ-ອາກອນ, ຕຳຫຼວດ ແລະ ການເງິນ ແລະ ແຜນການ. ການຮ່ວມມືກັນຂອງທຸກຂະແໜງການຂອງພາກລັດ ແລະ ທົ່ວສັງຄົມ ສາມາດປົກປ້ອງປະຊາຊົນຈາກພະຍາດທີ່ເກີດຈາກຢາສູບ.”
ໃນການມາຢ້ຽມຢາມ ແລະ ເຮັດວຽກຄັ້ງນີ້, ມີຜູ້ຊ່ຽວຊານມາຈາກ ກອງເລຂາສົນທິສັນຍາສາກົນ ວ່າດ້ວຍການຄວບຄຸມຢາສູບ, ອົງການອະນາໄມໂລກ, ອົງການສະຫະປະຊາຊາດ ເພື່ອການພັດທະນາ, ສະມາພັນຄວບຄຸມຢາສູບອາຊຽນ ແລະ ມູນິທິລົນນະລົກ ເພື່ອການບໍ່ສູບຢາແຫ່ງປະເທດໄທ ແລະ ກະຊວງສາທາລະນະສຸກແຫ່ງປະເທດໄທ.
