ກະຊວງສາທາລະນະສຸກ ແລະ ອົງການອະນາໄມໂລກເປີດນຳໃຊ້ເຄື່ອງຜະລິດອົກຊີແຊນທາງການແພດໃໝ່ ຢູ່ແຂວງພາກໜືອຂອງ ສປປ ລາວ

ການຊ່ວຍເຫຼືອຂອງອົງການອະນາໄມໂລກຄັ້ງນີ້ ຈະເຮັດໃຫ້ໂຮງໝໍແຂວງທັງ 3 ແຫ່ງ ສາມາດຜະລິດອົກຊີແຊນດ້ວຍຕົນເອງເປັນຄັ້ງທຳອິດ ເຊິ່ງຈະສາມາດຜະລິດໄດ້ສູງສຸດເຖິງ 75 000 ບັ້ງຕໍ່ປີ. ອົກຊີແຊນເຫຼົ່ານີ້ຈະສາມາດຊ່ວຍເຫຼືອຊີວິດຄົນເຈັບໃນລະຫວ່າງການຜ່າຕັດ, ການປິ່ນປົວແມ່ ແລະ ເດັກ ແລະ ສຳລັບຄົນເຈັບທີ່ເປັນພະຍາດຫົວໃຈວາຍ, ພະຍາດຫອບຫືດ ຫຼື ອັກເສບປອດ. ນອກຈາກນີ້, ຄວາມອາດສາມາດໃນການຜະລິດອົກຊີແຊນຂອງທ້ອງຖິ່ນທີ່ເພີ່ມຂຶ້ນ ຈະຊ່ວຍປົກປ້ອງໂຮງໝໍ ແລະ ຄົນເຈັບຈາກຄ່າໃຊ້ຈ່າຍສຳລັບຊື້ອົກຊີແຊນທີ່ເພີ່ມຂຶ້ນຈາກໄພເງິນເຟີ້. 

ອົກຊີແຊນທາງດ້ານການແພດ ເປັນການປິ່ນປົວທີ່ຊ່ວຍຮັກສາຊີວິດຈາກບັນດາພະຍາດຕ່າງໆ, ລວມທັງພະຍາດໂຄວິດ-19. ໃນ ສປປ ລາວ, ພື້ນຖານໂຄງລ່າງໃນການຜະລິດອົກຊີແຊນ ແມ່ນມີຈຳກັດ ແລະ ອາໄສການນຳເຂົ້າອົກຊີແຊນແຫຼວຈາກປະເທດເພື່ອນບ້ານ ຄື ປະເທດຫວຽດນາມ ຫຼື ປະເທດໄທ. ໃນລະຫວ່າງພາວະສຸກເສີນດ້ານສາທາລະນະສຸກ ເຊັ່ນ ການລະບາດຂອງພະຍາດໂຄວິດ-19 ສາມາດສົ່ງຜົນກະທົບຕໍ່ຄວາມສາມາດໃນການສະໜອງອົກຊີແຊນ ເນື່ອງຈາກມີຄວາມຕ້ອງການເພີ່ມຂຶ້ນ.

A patient in Savannakhet Provincial Hospital receives medical oxygen. WHO/Will Seal 

ໃນຂະນະລົງຢ້ຽມຢາມເບິ່ງເຄື່ອງຜະລິດອົກຊີແຊນ ທີ່ໂຮງໝໍແຂວງຫຼວງພະບາງ, ທ່ານ ປອ ດຣ ບຸນແຝງ ພູມມະໄລສິດ, ລັດຖະມົນຕີ ກະຊວງສາທາລະນະສຸກ ໄດ້ສະແດງຄວາມຂອບໃຈມາຍັງອົງການອະນາໄມໂລກ ໂດຍໄດ້ກ່າວວ່າ: “ການຊ່ວຍເຫຼືອຂອງອົງການອະນາໄມໂລກໃນການຕິດຕັ້ງ ແລະ ເປີດການນຳໃຊ້ເຄື່ອງຜະລິດອົກຊີແຊນຢູ່ທີ່ໂຮງໝໍແຂວງຫຼວງພະບາງ ແລະ ແຂວງອຸດົມໄຊ ມີຄວາມສຳຄັນຫຼາຍໃນການສ້າງຄວາມເຂັ້ມແຂງໃຫ້ແກ່ພື້ນຖານໂຄງລ່າງສຳລັບການປິ່ນປົວຮັກສາສຸຂະພາບ, ການປັບປຸງຄວາມອາດສາມາດໃນການໂຕ້ຕອບໃນສະຖານະການສຸກເສີນ, ການຍົກລະດັບຄຸນນະພາບໂດຍລວມຂອງການປິ່ນປົວຮັກສາສຸຂະພາບ ຢູ່ໃນ 2 ແຂວງ ແລະ ການຫຼຸດຜ່ອນຄ່າໃຊ້ຈ່າຍສຳລັບການປິ່ນປົວ. ພວກເຮົາຂໍສະແດງຄວາມຂອບໃຈຕໍ່ກັບການຊ່ວຍເຫຼືອຢ່າງຕໍ່ເນື່ອງຈາກອົງການອະນາໄມໂລກ ເພື່ອຊ່ວຍຮັບປະກັນໃຫ້ທຸກຄົນມີສຸຂະພາບທີ່ດີ ໃນ ສປປ ລາວ." 

ຄຽງຄູ່ກັບລະບົບການຜະລິດ ແລະ ຕື່ມອົກຊີແຊນ, ການສະໜັບສະໜູນຍັງລວມມີການກໍ່ສ້າງສິ່ງອຳນວຍຄວາມສະດວກ, ເຄື່ອງຜະລິດໄຟຟ້າສຳຮອງ, ເຄື່ອງອາໄຫຼ່ ທີ່ສາມາດໃຊ້ໃນ 3 ປີທຳອິດ, ບັ້ງບັນຈຸອົກຊີແຊນ ຈໍານວນ 200 ບັ້ງໃນແຕ່ລະຈຸດ ແລະ ການຝຶກອົບຮົມໃຫ້ນັກວິຊາການແຕ່ລະໂຮງໝໍ. 

VIPs participate in the opening ceremony of Luang Prabang Provincial Hospital’s new oxygen plant. WHO/Somlith KHOUNPASEUTH 

ທ່ານ ນາງ ດຣ ຢູ ລີ ປາກ, ຮັກສາການຜູ້ຕາງໜ້າ ອົງການອະນາໄມໂລກ ໄດ້ກ່າວວ່າ: "ອົກຊີແຊນ ເປັນອົງປະກອບທີ່ສຳຄັນໃນການປິ່ນປົວຄົນເຈັບທີ່ມີອາການເຈັບເປັນຕ່າງໆ ໂດຍສະເພາະການເຈັບເປັນທາງລະບົບຫາຍໃຈ ແລະ ຢູ່ໃນກໍລະນີສຸກເສີນຕ່າງໆ. ການມີເຄື່ອງຜະລິດອົກຊີແຊນ ຈະຊ່ວຍຮັບປະກັນໃຫ້ໂຮງໝໍແຂວງເຫຼົ່ານີ້ ມີການກຽມພ້ອມທີ່ດີ ໃນການປິ່ນປົວຄົນເຈັບໃນຂັ້ນວິກິດ ແລະ ສຸກເສີນໃນທາງການແພດຢ່າງມີປະສິດທິພາບ ແລະ ສາມາດເຂົ້າເຖິງໄດ້. ອົງການອະນາໄມໂລກ ຈະສືບຕໍ່ເຮັດວຽກຢ່າງໃກ້ຊິດກັບກະຊວງສາທາລະນະສຸກ ເພື່ອປັບປຸງລະບົບການປິ່ນປົວຮັກສາສຸຂະພາບຂອງ ສປປ ລາວ, ເພີ່ມຄວາມອາດສາມາດໃນການຜະລິດ ແລະ ສະໜອງອົກຊີແຊນ ແລະ ຮັບປະກັນໃຫ້ທຸກຄົນມີສຸຂະພາບທີ່ດີ.” 

ການສະໜອງອົກຊີແຊນຖືເປັນໜຶ່ງໃນບັນດາວຽກງານບູລິມະສິດສຳລັບອົງການອະນາໄມໂລກໃນການຊ່ວຍເຫຼືອ ສປປ ລາວ ທັງລະຫວ່າງ ແລະ ພາຍຫຼັງການລະບາດຂອງພະຍາດໂຄວິດ-19 ເຊິ່ງອົງການອະນາໄມໂລກໄດ້ເຮັດວຽກປະສານງານຢ່າງໃກ້ຊິດກັບບັນດາຄູ່ຮ່ວມພັດທະນາຕໍ່ກັບວຽກງານດັ່ງກ່າວ. ການຊ່ວຍເຫຼືອດັ່ງກ່າວລວມມີ ການສະໜອງອົກຊີແຊນ ແລະ ອຸປະກອນອົກຊີແຊນທາງການແພດ, ການຝຶກອົບຮົມພະນັກງານແພດໝໍ ແລະ ການຊ່ວຍເຫຼືອດ້ານວິຊາການ ເຊິ່ງເປັນສ່ວນໜຶ່ງຂອງການສະໜັບສະໜູນໃນໄລຍະຍາວ ເພື່ອປັບປຸງການບໍລິການທາງດ້ານສາທາລະນະສຸກ ແລະ ສ້າງລະບົບສາທາລະນະສຸກທີ່ໝັ້ນຄົງ ແລະ ຍືນຍົງ. 

ຊ່ອງທາງຕິດຕໍ່: 

ກະຊວງສາທາລະນະສຸກ ສປປ ລາວ  

ທ່ານ ວິສິດ ຄຳລືຊາ 

ຫົວໜ້າການສູນສະຖິຕິ ແລະ ຂ່າວສານສາທາລະນະສຸກ  

ໂທ: +856 20 2250 2862  

ອີເມວ: vkhamlusa@yahoo.com  

ອົງການອະນາໄມໂລກ ປະຈຳ ສປປ ລາວ  

ທ່ານ ວິວ ຊຽວ (Will Seal)  

ຫົວໜ້າໜ່ວຍງານການສື່ສານເພື່ອສຸຂະພາບ  

ໂທ: +856 20 5551 0788  

ອີເມວ: sealw@who.int