ທ່ານ ປອ ດຣ ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ, ໄດ້ສິ້ນສຸດການລົງຕິດຕາມ ແລະ ຢ້ຽມຢາມ ໂຮງໝໍແຂວງ, ໂຮງໝໍຊຸມຊົນ ແລະ ໂຮງໝໍນ້ອຍ ຂອງ ແຂວງຊຽງຂວາງ ແລະ ແຂວງຫົວພັນ ລວມທັງໝົດ 15 ແຫ່ງ , ໃນລະຫວ່າງວັນທີ 19-25 ກັນຍາ ທີ່ຜ່ານມາ. ທ່ານລັດຖະມົນຕີໄດ້ລົງຕິດຕາມກວດກາຄຸນນະພາບຂອງການບໍລິການ ແລະ ຂອງພະນັກງານຂະແໜງສາທາລະນະສຸກ, ຈຸດກວດກາສຸຂະພາບຕາມຊາຍແດນ, ແລະ ວຽກງານການສັກວັກຊີນກັນພະຍາດໂຄວິດ-19 ເພື່ອ ຊອກຫາທາງໃນການປັບປຸງ ແລະ ແກ້ໄຂວຽກງານທາງດ້ານສາທາລະນະສຸກໃນຕໍ່ໜ້າ.
“ພາຍຫຼັງໄດ້ຮັບຟັງຄຳເຫັນຈາກໜ່ວຍງານຕ່າງໆ, ຂ້າພະເຈົ້າໄດ້ເຫັນວ່າພະນັກງານຂະແໜງສາທາລະນະສຸກຂອງພວກເຮົາໄດ້ເຮັດວຽກຢ່າງໜັກ. ແຕ່ພວກເຂົາກໍ່ຍັງປະເຊີນກັບສິ່ງທ້າທາຍຫຼາຍຢ່າງໃນການເບິ່ງແຍງ ແລະ ປົກປ້ອງ ສຸຂະພາບຂອງປະຊາຊົນ ຢູ່.” ກ່າວໂດຍທ່ານລັດຖະມົນຕີ.
“ພວກເຮົາໄດ້ປະສົບຜົນສຳເລັດຢ່າງຫລວງຫລາຍ ໃນຫຼາຍຂົງເຂດບຸລິມະສິດ, ໂດຍສະເພາະແມ່ນວຽກງານທາງດ້ານສຸຂະພາບຂອງແມ່ ແລະ ເດັກ. ເຖິງຢ່າງໃດກໍ່ຕາມ, ພວກເຮົາຍັງຈຳເປັນຕ້ອງຊອກຫາວິທີທາງເພື່ອສ້າງຄວາມເຂັ້ມແຂງທາງດ້ານທັກສະໃຫ້ແກ່ພະນັກງານ, ຈັດສັນຄົນໃຫ້ເໝາະສົມກັບວຽກງານ, ໃນສະຖານທີ່ ທີ່ຕ້ອງການພວກເຂົາທີ່ສຸດ. ມັນເຖິງເວລາແລ້ວ ພວກເຮົາຕ້ອງເພີ່ມຄວາມພະຍາຍາມຂຶ້ນເພື່ອປິດຊ່ອງວ່າງຂອງວຽກງານການສັກຢາວັກຊີນ, ບໍ່ວ່າຈະເປັນວັກຊີນກັນພະຍາດໂຄວິດ-19 ແລະ ວັກຊີນປົກະຕິ.”
ທ່ານ ລັດຖະມົນຕີ ຍັງໄດ້ກ່າວຕໍ່ວ່າ: “ສິ່ງທີ່ເປັນໝາກຫົວໃຈຂອງສິ່ງທ້າທາຍເຫຼົ່ານີ້ ແມ່ນການຮັບຟັງສຽງຂອງຜູ້ທີ່ວຽກໃນຊຸມຊົນ. ກຸ່ມຄົນເຫຼົ່ານີ້ຈະຮູ້ວ່າພວກເຂົາຕ້ອງການຫຍັງ. ພວກເຮົາຕ້ອງຮັບຟັງສຽງຂອງພວກເຂົາ ເພື່ອເປັນແນວທາງໃນການສ້າງການບໍລິການສາທາລະນະສຸກທີ່ມີຄຸນນະພາບດີ ແລະ ສາມາດເຂົ້າເຖິງໄດ້.”
ທ່ານ ລັດຖະມົນຕີ ບຸນແຝງ, ພ້ອມດ້ວຍ ທ່ານ ນາງ ດຣ ຢິງ ຣູ ແຈັກເກີລີນ ໂລ, ຜູ້ຕາງໜ້າອົງການອະນາໄມໂລກ, ແລະ ທ່ານ ອຶນຢອງ ຄິມ, ຜູ້ຕາງໜ້າອົງການໂກຟີປະຈຳ ສປປ ລາວ, ໄດ້ຮ່ວມເດີນທາງ ແລະ ປຶກສາຫາລືກັນກ່ຽວກັບບັນດາໂຄງການທີ່ໄດ້ຮັບຜົນສຳເລັດ ແລະ ວິທີແກ້ໄຂບັນຫາໃນອະນາຄົດ.
ການຕິດຕາມໃນຄັ້ງນີ້ ລວມມີການຢ້ຽມຢາມຊຸມຊົນຕ່າງໆທີ່ໄດ້ຮັບການສະໜັບສະໜຸນຈາກໂຄງການ CONNECT- ໂຄງການຈາກກະຊວງສາທາລະນະສຸກ ແລະ ກະຊວງພາຍໃນ, ພາຍໃຕ້ການຊ່ວຍເຫຼືອຈາກອົງການອະນາໄມໂລກ. ໂຄງການນີ້ໄດ້ນຳພາບັນດາຜູ້ນຳໃນຊຸມຊົນ, ຜູ້ນຳຈາກບັນດາເຜົ່າຕ່າງໆ, ພະນັກງານສາທາລະນະສຸກ ແລະ ອຳນາດການປົກຄອງທ້ອງຖິ່ນ ໃຫ້ເຮັດວຽກຮ່ວມກັນເພື່ອປັບປຸງແຜນວຽກທາງດ້ານສາທາລະນະສຸກ, ສ້າງຄວາມໄວ້ເນື້ອເຊື່ອໃຈ ແລະ ສາຍພົວພັນເຊິ່ງກັນ ແລະ ກັນ. ໝາກຜົນຂອງໂຄງການນີ້ສະແດງອອກຢູ່ບ່ອນວ່າ ມັນໄດ້ຊ່ວຍໃຫ້ອັດຕາການຮັບວັກຊີນກັນພະຍາດໂຄວິດ-19 ສູງຂຶ້ນໃນຫຼາຍຊຸມຊົນ, ແລະ ບັນລຸເຖິງ 100% ໃນກຸ່ມຄົນທີ່ມີຄວາມສ່ຽງສູງ.
“ຂ້າພະເຈົ້າຮູ້ສຶກປະທັບໃຈຫຼາຍທີ່ໄດ້ເຫັນພະຍາບານ ແລະ ພະນັກງານຂະແໜງສາທາລະນະສຸກຫຼາຍໆທ່ານ ຮັບຟັງຊຸມຊົນຂອງພວກເຂົາ ແລະ ປັບປຸງວຽກງານຂອງພວກເຂົາເພື່ອໃຫ້ເຂົ້າກັບຄວາມຕ້ອງການຂອງປະຊາຊົນ,”. ກ່າວໂດຍ ດຣ ໂລ. “ເຖິງວ່າຈະບໍ່ມີຊັບພະຍາກອນຈາກພາຍນອກ, ພວກເຂົາກໍ່ຍັງສາມາດເຮັດໃຫ້ສຸຂະພາບຂອງປະຊາຊົນດີຂື້ນ ແລະ ສາມາດຊ່ວຍ ຊີວິດຂອງຫຼາຍໆຄົນ.
“ໃນຂະນະດຽວກັນ, ພວກເຮົາກໍ່ຍັງເຫັນເຖິງຄວາມຈຳເປັນທີ່ຈະຕ້ອງປ້ອງກັນສຸຂະພາບ ແລະ ຊີວິດຂອງປະຊາຊົນ ດ້ວຍການເພີ່ມອັດຕາປົກຄຸມຂອງວັກຊີນໃຫ້ໄດ້ເຕັມອັດຕາ. ວັກຊີນ ສາມາດຮັກສາຊີວິດ ແລະ ປົກປ້ອງຄອບຄົວຂອງທຸກຄົນ. ພວກເຮົາຕ້ອງປິດຊ່ອງວ່າງ. ຖ້າຫາກ ຄົນໃນຄອບຄົວຂອງທ່ານຍັງບໍ່ທັນໄດ້ຮັບວັກຊີນ, ກະລຸນາໄປຮັບວັກຊີນໃນທັນທີ.”
ດຣ ໂລ ກ່າວຕື່ມວ່າ: “ພວກເຮົາຫວັງຢ່າງຍິ່ງວ່າ ຈະສາມາດສືບຕໍ່ສະໜັບສະໜຸນ ກະຊວງສາທາລະນະສຸກ ໂດຍສະເພາະໃນການສົ່ງເສີມທັກສະ ແລະ ຄວາມອາດສາມາດໃຫ້ແກ່ພະນັກງານ, ຕໍ່ສູ້ກັບພະຍາດໂຄວິດ-19, ແລະ ຮັບປະກັນການໃຫ້ບໍລິການທາງດ້ານສາທາລະນະສຸກໃຫ້ແກ່ທຸກຄົນ ໃນທົ່ວປະເທດ.”
ໃນປັດຈຸບັນ, ອັດຕາການປົກຄຸມຂອງວັກຊີນກັນພະຍາດໂຄວິດ-19 ທົ່ວປະເທດ ໄດ້ກວມເອົາທັງໝົດ 72%, ໃນນີ້ ກຸ່ມຜູ້ສູງອາຍຸ ແລະ ພະນັກງານຂະແໜງສາທາລະນະສຸກໄດ້ຮັບການປົກປ້ອງກວມເອົາ 74,3% ແລະ 95,5% ຕາມລຳດັບ. ແຕ່ກົງກັນຂ້າມ, ອັດຕາປົກຄຸມຂອງວັກຊີນຮອບປົກກະຕິຊ້ຳພັດຫຼຸດລົງ ໃນໄລຍະການລະບາດຂອງພະຍາດໂຄວິດ-19.
ພາຍຫຼັງການຕິດຕາມ ແລະ ຢ້ຽມຢາມ, ທ່ານ ຄິມ, ຜູ້ຕາງໜ້າອົງການໂກຟີ ປະຈຳ ສປປ ລາວ ໄດ້ກ່າວວ່າ: “ພວກເຮົາຮູ້ສຶກຕື້ນຕັນໃຈຫຼາຍ ທີ່ໄດ້ເຫັນໝາກຜົນທີ່ພວກເຮົາໄດ້ປະຕິບັດ, ໂດຍສະເພາະວຽກງານສຸຂະພາບ ແມ່ ແລະ ເດັກ, ຊຶ່ງເຮັດໃຫ້ບໍ່ມີໂຕເລກເສຍຊີວິດໃນປີນີ້. ພະນັກງານທຸກຄົນມີຄວາມຮັບຜິດຊອບໃນໜ້າທີ່ທີ່ໄດ້ຮັບມອບໝາຍ ແລະ ຊອກຫາຄວາມຊ່ວຍເຫຼືອໄດ້ຢ່າງໄວວາໃນກໍລະນີທີ່ເກີນຄວາມສາມາດໃນການປີ່ນປົວຂອງພວກເຂົາ. ຜົນງານໃນຄັ້ງນີ້ໄດ້ສະທ້ອນໃຫ້ເຫັນເຖິງຄວາມເຂັ້ມແຂງຂອງການປະສານງານລະຫວ່າງ ອົງການໂກຟີ, ກະຊວງສາທາລະນະສຸກ ແລະ ຂະແໜງການສາທາລະນະສຸກຂັ້ນທ້ອງຖິ່ນ.
ກະຊວງສາທາລະນະສຸກໄດ້ວາງແຜນທີ່ຈະທົບທວນຜົນທີ່ໄດ້ຮັບຈາກການປະເມີນ ແລະ ຊອກຫາວິທີການແກ້ໄຂທີ່ຈຳເປັນ ແລະ ຊ່ອງວ່າງຕ່າງໆ. ອົງການອະນາໄມໂລກ ແລະ ອົງການໂກຟີ ປະຈຳ ສປປ ລາວ ກໍ່ພ້ອມທີ່ຈະສືບຕໍ່ໃຫ້ການສະໜັບສະໜຸນເພື່ອການເຂົ້າເຖິງສາທາລະນະສຸກຂອງປະຊາຊົນທົ່ວປະເທດລາວ.